Icyorezo COVID-19 cyahereye mu gihugu cy’Ubushinwa gusa kuri ubu iki cyorezo kimaze gukwirakwira mu bihugu byinshi kuri iyi si, byibuze ku isi hagaragaye abantu barenga ibihumbi 900,000 banduye COVID-19 mu bihugu 180, byibuze abagera ku bihumbi 45,000 bahitanwe n’iki cyorezo.
Mu bihugu bitandukanye hagiye hafatwa ingamba mu guhangana n’iyi virusi ya Corona, muri zo harimo guhagarika ingendo z’indege, gusaba abantu kuguma mu ngo zabo n’izindi. Muri Afurika y’Iburasirazuba aho n’Urwanda ruherereye iki cyorezo cyamaze kuhagera aho mu Rwanda abamaze gutangazwa ko banduye COVID-19 bagera kuri 82. Kenya, Tanzania, Uganda ndeste n’Uburundi na ho bemeje ko hagaragaye abantu barwaye Coronavirusi.
Kuri uyu munsi mu masaha make ashize nibwo Bank y’isi yatangaje ko yemereye Kenya inguzanyo y’amafaranga agera kuri miliyoni 50 z’amadorari kugira ngo akoreshwe mu guhangana n’iki cyorezo.
Minisitiri w’ubuzima muri iki gihugu Mutahi Kagwe yatangaje ko aya mafaranga azakoreshwa mu kugura ibikoresho birinda abaganga kwandura, ikindi ngo aya mafaranga azakoreshwa mu kugura ibikoresho by’isuku ndetse no mu kugura ibitanda kugira ngo bongere umubare wabyo mu bitaro. Muri iki gihugu umwe mu baganga byatangajwe ko yanduye Coronavirusi.
Kugeza ubu muri Kenya habonetse abantu 81 banduye COVID-19 iterwa na virusi ya Corona, ikindi umuntu 1yahitanwe n’iki cyorezo muri iki gihugu.
