Muri iyi minsi isi yose ihanganye n’icyorezo COVID-19 giterwa na virusi ya Corona, iki cyorezo cyahereye mu Bushinwa mu mugi wa Wuhan. Nubwo COVID-19 yahereye mu Bushinwa kugeza ubu imaze gukwira mu bihugu byinshi byo ku isi. Imibare yerekana ko kuva iki cyorezo cyaduka, mu bihugu 181 byo ku isi kimaze kwica abantu barenga ibihumbi 60,000 mu gihe abarenga miliyoni 1 bamaze kucyandura.
Kuri uyu wa gatandatu mu gihugu cy’Ubushinwa bafashe iminota 3 yo kwibuka abahitanwe na COVID-19 iterwa na virusi ya Corona. Mu bibutswe uyu munsi harimo Li Wenliang umuganga wishwe n’iki cyorezo rugikubita mu mugi wa Wuhan.
Iminota 3 yo kwibuka aba bantu mu gihugu cy’Ubushinwa hose bayimaze baha ba nyakwigendera icyubahiro. Muri iki gihugu abantu barenga ibihumbi 3,000 bishwe na COVID-19.
Leta Zunze Ubumwe z’Amerika ubu ni ho harikwibasirwa ku buryo bukomeye n’iki cyorezo. Ku munsi w’ejo hashize kaminuza ya Johns Hopkins yatangaje ko abantu bagera ku bihumbi 7,152 bishwe na COVID-19 muri USA. Ibi byahindutse uyu munsi kuko biyongereyeho abagera 1,480 bishwe n’iki cyorezo, imibare idasanzwe.
Mu Bushinwa aho COVID-19 yahereye uyu munsi batangaje abantu 19 banduye iki cyorezo bakaba bagabanyutse kuko ejo hashize bari 31, aba bose bakaba ari abantu baturutse hanze y’iki gihugu.
